تساهيل || أسهل طريقة تسوي فيها نجوم

 السلام عليكم ورحمة الله وبركاته

طبتم وطابت أيامكم 

رجعنا اليوم لتساهيل 
بإذن الله حيكون كل أحد 
مرة تساهيل ومرة منتج رهيب !

اليوم حنسوي سوا نجمة من الورق ! 
مين فيكم سمع عن فن الأوريقامي 

ايوة بالزبط دا الفن اللي يقولك

 تعاملي مع الورق بخفة وهدوء !

فن طي الورق 

العمل عليه خفيف ولطيف بس 

يحتاج روقان بشكل كبير

سمية منجد طولتي عالناس خلاص 

وقفي كلام وأدخلي ف الشغل

نبدأ بسم الله ..
طبعاً كل اللي تحتاجوه ورق < يفضل ملون 
و مقص واذا تحبو قلم كمان 

قصو الورق بشكل خيوط طولية 
بالعرض اللي تحبوه 
وبس سوو زي الفيديو !

زبطتكم صح ؟

طيب بعدين اش اسوي فيها 

فيه أكثر من فكرة ممكن تتنفذ

1 - ممكن تكون كلوحة تجمل المكان 
زي غرف الأطفال أو غرفة الأعمال اليدوية 
أو جنب مكتبك أحس تعطيك طاقة .

2 - ممكن تكتبي جوتها رسالة لشخص 
وتجمعي له رسائل لطيفة فيها 
وتحطيها في علبة .

3 - ممكن كمان تكون فكرة للأطفال 
نشاط أو لعبة كل يوم تتشاركو فيها سوا 
وممكن تكون مكافأة للطفل إذا سوا 
شي كويس يسحب نجمة  و ... 

4 - ممكن تتخيط سوا وتكون زينة استقبال 
أو ديكور حفل يجمل المكان بلمسة بسيطة 

عندك أفكار أكثر 
أكتبيها ف التعليقات
وستضاف للتدوينة 

أتمنى تكون تدوينة خفيفة عليكم 

وصح اللي طبق وحاب يعرض عمله 
يرسل لي الصورة و حنشرها بإذن الله 

دمتم ملهمين ي أصدقاء سُكّرة